Hukumar yaƙi da cin hanci da rashawa ta ICPC ta bai wa tsohon gwamnan jihar Kaduna, Mallam Nasir El-Rufai, beli na wucin gadi bayan rasuwar mahaifiyarsa, Hajiya Umma El-Rufai, wadda ta rasu a jiya Juma’a.
An bayar da wannan ‘yanci na wucin gadi ne domin ba shi damar gudanar da jana’izar mahaifiyarsa, wadda ta rasu a birnin Cairo na kasar Masar bayan jinya.
Ɗa ga El-Rufai, Bashir, ya tabbatar da sakin mahaifinsa a wani sako da ya wallafa a shafinsa na X a daren Juma’a.
Fitattun ‘yan Najeriya da suka hada da shugaban kasa Bola Tinubu, tsohon mataimakin shugaban kasa Atiku Abubakar, da gwamnan jihar Kaduna Uba Sani sun mika sakonnin ta’aziyya ga iyalan marigayiyar.
Rahotanni sun ce Hajiya Umma El-Rufai tana da kimanin shekaru 100 a duniya.
Rasuwarta ta zo ne mako guda bayan mutuwar matar dan uwanta, Safiya Ali Rufai, wanda hakan ya kara tsananta jimamin iyalin.
Jikanta Bello El-Rufai ne ya sanar da rasuwar a shafinsa na Facebook inda ya bukaci a yi mata addu’a.
Shugaban kasa Bola Tinubu ya bayyana marigayiyar a matsayin mace da ta yi rayuwa mai ma’ana, wadda ta raini ‘ya’ya da jikoki da suka bayar da gudunmawa ga kasa.
Shi ma Atiku Abubakar ya bayyana alhini kan rasuwar tare da yin addu’ar Allah ya jikanta ya kuma ba iyalanta hakurin jure wannan rashi.
Gwamna Uba Sani ya bayyana marigayiyar a matsayin mace mai tausayi da jajircewa, wadda ta taka rawa wajen hada kan al’umma da kuma tallafawa masu bukata.
