Gwamnatin ƙasar Burkina Faso ta sako jirgin sojin Najeriya 11, tare da jirgin sojan saman Najeriya NAF C-130, bayan da aka tsare su a sakamakon saukar gaggawa da jirgin ya yi a birnin Bobo-Dioulasso.
Mai magana da yawun Ma’aikatar Harkokin Waje ta Najeriya, Kimiebi Ebienfa, ya tabbatar da sakin a wata sanarwa da ya fitar a daren Laraba, inda ya ce an kammala tattaunawa cikin nasara tsakanin jami’an ofishin jakadancin Najeriya da hukumomin Burkina Faso.
A cewarsa, tsare sojojin da jirgin ya faru ne a ranar 8 ga Disamba, 2025, bayan jirgin ya samu matsalar fasaha jim kaɗan bayan tashinsa daga Lagos zuwa Portugal, lamarin da ya tilasta masa sauka a Burkina Faso.
Sanarwar ta bayyana cewa gwamnatin Burkina Faso ta bayyana dalilin tsare su ne domin bincike da tabbatar da tsaro, amma daga bisani an sallame su bayan an gamsu da bayanan da aka gabatar.
Gwamnatin Najeriya ta nuna jin daɗinta kan yadda aka warware lamarin cikin lumana, tare da jaddada muhimmancin haɗin kai da fahimtar juna tsakanin ƙasashen yankin.
Bayan tsawon tattaunawar diflomasiyya, Shugaban Ƙasa Bola Ahmed Tinubu ya bayar da umarni ga Ministan Harkokin Waje, Ambasada Yusuf Tuggar, da ya tura wakili na musamman zuwa Ouagadougou, domin sasanta lamarin cikin gaggawa.
Rundunar Sojin Saman Najeriya NAF ta bayyana cewa an bai wa sojojin da aka tsare kulawa ta lafiya, kuma ba a ci zarafinsu ko yi musu wata mu’amala mai kyauyayi ba a tsawon lokacin da suka shafe a tsare.
Haka kuma, Majalisar Wakilai ta kasa ta nuna damuwa kan faruwar lamarin, inda ta buƙaci gwamnati ta ɗauki matakan da suka dace domin tabbatar da sakin sojojin da jirgin cikin gaggawa da kuma kare mutuncin ƙasar a matakin ƙasa da ƙasa.
A ƙarshe, gwamnatin Najeriya ta jaddada cewa za ta ci gaba da amfani da hanyoyin diflomasiyya da haɗin kai tsakanin ƙasashen yankin, domin kauce wa sake faruwar irin wannan lamari a nan gaba.
